Mecaniche cuantistiche te scuele secondarie

Ristret

Un progjet pe inovazion didatiche e la formazion dai insegnants in Mecaniche Cuantistiche al consist di doi elements principâi: i plui impuartants esperiments tradizionâi (p.e. Franck-Hertz, interference, polarizazion) e la formulazion di Dirac de teorie. In cheste note o sbozìn une strategjie pussibile par introdusi il formalisim di fonde de Mecaniche Cuantistiche cence pretindi cognossincis avanzadis di matematiche o fisiche. La “formulazion di Dirac” de Mecaniche Cuantistiche e ven disvilupade traviers la juste gjeneralizazion de descrizion di un sempliç sistem a doi stâts, al ven a stâi la polarizazion liniâr di fotons che a interagjissin cun polaroids e cristai birefranzents. O discutìn ancje la relazion jenfri osservabilis fisichis e operadôrs liniârs, une conession che, par solit, e je considerade il concet “plui dificil” de Mecaniche Cuantistiche. Un studi di fatibilitât didatiche al è stât pussibil midiant une sperimentazion intune cuinte di Liceu.