Lis valutazions storiografichis di Lamalle te Prefazion dal libri Vita e opere di Galileo Galilei di Pio Paschini Impostazions storiografichis a confront

Ristret

Il câs de opare su Galilei consegnade di Pio Paschini tal 1944 pe stampe, ma publicade dome vincj agns dopo, al è pôc cognossût fûr dal mont eclesiâl catolic. Ma, ancje se a son passâts zaromai cuasi setante agns, e je une storie che e stice domandis sui limits de cognossince sientifiche e su la influence des scuviertis sientifichis sedi su la societât che sul rapuart tra sience e religjon. Il libri al fo publicât par cure de Academie Pontificie des Siencis, la stesse che e veve decidût vincj agns prime di archiviâlu cence publicâlu. P. Edmond Lamalle, jesuite e storic de sience, al fo incjariât di curâ la publicazion, zontant notis di inzornament daûr des gnovis liniis storiografichis. Lamalle no dome al metè te sô prefazion justis notis critichis, ma al jentrâ tal test origjinâl, inserint corezions e zontis, metudis in evidence dal voli atent di bonsignôr Pietro Bertolla e puartadis sul palc dal Congrès dal centenari de nassite dal prelât cjargnel. La man di Lamalle si inserìs propit li che l’autôr al conte il disvilup dal famôs procès subît di Galilei devant dal Tribunâl dal Sant Ufizi, viodût dal mont sientific come la prove di un conflit eterni tra sience e religjon. Ancje in chest articul, l’autôr, cuasi cincuante agns daspò de publicazion dal lavôr di Paschini par cure di Lamalle, al sint la necessitât di tornâ a lei i judizis dal savi jesuite di dentri un mont une vore cambiât, soredut de conotazion tecnologjiche de nestre societât e di gnûfs contribûts e studis su la epistemologjie sientifiche e sul câs Galilei. La rileture de prefazion di Lamalle e à permetût duncje di fâ ancje cualchi riflession personâl