Educazion linguistiche te scuele primarie e Language Teacher Cognition. Risultâts di un scandai in Lombardie

Ristret

La Italie e je caraterizade di simpri di un plurilinguisim che, di là dal talian e des sôs varietâts, al cjape dentri diviersis lenghis minoritariis storichis e un numar une vore alt di dialets. Gjavade cualchi rare ecezion, dut câs, la scuele taliane e je stade par une vore di timp une istituzion monolengâl. Tai ultins cincuante agns, la internazionalizazion e la globalizazion, la domande cressinte di aprendiment des lenghis forestis, lis migrazions continentâls e intercontinentâls (che a àn puartât te societât taliane un neoplurilinguism inedit par numar di varietâts e gjenar di lenghis coinvoltis), a àn metût la scuele devant di sfidis gnovis e inmò plui dificilis. Plui o mancul tal stes arc di timp, si è vignude delineant in ambit teoric une vision de educazion linguistiche tant che procès globâl e unitari che si displee a traviers dal curriculum e al cjape dentri l’insegnament/aprendiment de lenghe mari, de lenghe di scolarizazion, des lenghis forestis e classichis. La atuazion de educazion linguistiche e je, però, rimetude in ultime analisi ai insegnants e e je, duncje, condizionade a fuart des lôr cognossincis, crodincis, teoriis implicitis, opinions, convinzions, ategjaments e, in gjenerâl, di dut chel che al jentre te definizion di teacher cognition. Chest contribût al presente une part di risultâts di une indagjin plui ample, puartade indevant tal 2018 in Lombardie, midiant de soministrazion di un cuistionari. I dâts che culì a vegnin presentâts nus permetin di esplorâ la language teacher cognition dai insegnants di scuele primarie su diviers aspiets de educazion linguistiche.