La metodologjie dal CLIL par furlan Un câs di studi

Ristret

L’ûs di une lenghe zontade intal insegnament e intal aprendiment di materiis scolastichis tal Istitût Tecnic Industriâl (ITI, vuê ISIS, ven a stâi Istitût Statâl di Istruzion Superiôr) “Arturo Malignani” di Udin e je stade sperimentade intai agns ’90 dal secul passât. Dassen une esperience pionieristiche in Italie. La lenghe veicolâr doprade e jere l’Inglês e chest al à viert la strade ae metodologjie CLIL (Content and Language Integrated Learning). L’ûs dal furlan tant che lenghe veicolâr al è stât sperimentât intai prins agns dal secul presint intun ambient culturâl di acetazion de pussibilitât di pandi dissiplinis scolastichis in lenghis diferentis di chê doprade pal solit tes aulis. L’ûs dal furlan intun CLIL al è stât pussibil gracie al ricognossiment (cu la Leç nazionâl 482/99) dal furlan tant che lenghe di istruzion intun contest educatîf e di comunicazion plurilengâl. La prime sperimentazion dal CLIL furlan, promovude dal IRRSAE dal Friûl Vignesie Julie, e à fat sul imprin un grant scjas. Partide all’ITI “Malignani” intal 2005/06 e à cjapât dentri un grop di insegnants di materiis diferentis. In chestis primis esperiencis lis inovazions principâls a jerin stadis l’ûs tutoriâl de lenghe inglese e la produzion di modui dissiplinârs bilengâi. Cualchi an daspò, la seconde sperimentazion e je stade impostade in maniere plui struturade. I insegnants a son stat metûts dentri di un cors di inviament, tignût de Universitât Ca’ Foscari di Vignesie e, dilunc vie de sperimentazion, i risultâts a vignivin discutûts in graciis de disponibilitât di une plateforme web. Par rindi autentiche la sperimentazion in classe, a son stâts sielts contignûts dissiplinârs cun colegaments ae vite reâl. I argoments principâi a son stâts: a) la produzion di energjie eletriche di fonts rinovabilis, b) i argagns eletrics di cjase pe protezion di scjariis eletrichis, c) la regolazion a anel sierât de velocitât di un motôr eletric.