Lis consecuencis des variazions ambientâls di nature estreme: aspiets economics cuantitatîfs

Ristret

Lis dimensions economichis dai problemis che a vegnin daûr dai disastris naturâi a son ben presintis tai studis che a analizin lis consecuencis di chescj events tes areis colpidis e che a proponin misuris indreçadis ae prevenzion o ae rimozion dai dams, che a domandin la mobilitazion di cetantis risorsis finanziariis, tecnichis e operativis. Pe plui part, chescj contribûts si limitin a mostrâ dome i efiets dal disastri in timp curt e a dâ l’ordin di grandece dai dams che il disastri al puarte al capitâl fis sociâl e produtîf. La metodiche e je pal solit soredut descritive, masse leade aes cundizions e carateristichis specifichis des areis gjeografichis colpidis, e dominade de preocupazion di cuantificâ i dams e di dâ soluzions ai problemis che l’operadôr public al à di frontâ tes fasis dal socors e de ricostruzion. I studis che a frontin i problemis economics leâts ai disastris daûr di une impostazion plui gjenerâl e cun amplis contignûts concetuâi e metodologjics a son inmò avonde framentaris e lontans di une suficiente sistemazion teoriche. I contribûts principâi dâts de leterature economiche, statistiche e atuariâl si son fin cumò disvilupâts soredut tor di chescj filons di ricercje: a) i problemis mostrâts de cuvierture assicurative dai dams provocâts dai disastris naturâi, che a vegnin frontâts cui imprescj propris des dissiplinis atuariâls;

b) i procès di decision des fameis e des impresis in teme di adatament a cundizions di pericul, che a vegnin studiâts ancje midiant la teorie des decisions; c) i criteris di sielte e di valutazion in teme di convenience economiche dai progjets publics di intervent pal socors, pe prevenzion e la ricostruzion, che a domandin adataments particolârs des tecnichis di analisi coscj-beneficis e coscj-eficacie; d) la disposizion favorevule des fameis e des impresis des areis no colpidis dai dams a trasferiments di risorsis a pro des areis cjapadis dentri tal disastri. A son duncje contribûts teorics e metodologjics che a integnin i compuartaments des unitâts che a costituissin il sisteme economic, o ben fameis, impresis e operadôr public, devant di un event naturâl sucedût o previodût. Ta chest lavôr e vignarà fate une analisi dai contribûts principâi dal studi sui aspiets economics dai disastris naturâi e des consecuencis che chei a àn sui compuartaments des unitâts che a formin il sisteme economic. Si darà une atenzion particolâr ai studis che si sburtin fin ae formulazion di modei plui o mancul formalizâts che a frontin problemis di valutazion des grandecis cjapadis in considerazion. Dai compuartaments dai singui operadôrs si cirarà di rivâ ai efiets dal event danôs su dut il sisteme economic cjapât dentri, par chel che al inten lis pierditis di capitâl fis, i efiets di ativazion che a vegnin fûr dai invistiments sburtâts dal sfuarç di ricostruî e lis trasformazions che a jentrin tal marcjât dal lavôr, tal marcjât edilizi e ta chel finanziari.