La scuele furlane e la formazion dai insegnants

Ristret

Cuistion centrâl pe politiche lenghistiche pal furlan, salacor la cuistion plui impuartant che si cjatìn a frontâ pe tutele de lenghe, e reste chê de scuele e de formazion. Chest contribût al torne a proponi cualchi element di valutazion in cont di scuele furlane, di formazion dai insegnants e di Universitât. E propit l’Universitât furlane, o pensi, e à di vê une funzion fondamentâl ta chest cuadri e ta cheste prospetive, a partî de formazion – ch’e je ancje “informazion” – pai dipendents des aministrazions publichis, par rivâ a chê pai docents de scuele – ven a stâi formazion iniziâl dai mestris des scuelis de infanzie e des scuelis primariis, ma ancje formazion in servizi dai insegnants che son za inserîts tes listis regjonâls dai insegnants cun competencis certificadis pe lenghe furlane; sence dismenteâ i operadôrs dai sportei lenghistics che a son un presidi primari sul teritori. Al stes timp, al è necessari che ducj i sogjets che si ocupin de lenghe furlane a dialoghin tra di lôr, prin di dut la Regjon autonome, cui siei uficis e, inmò di plui, cu l’Agjenzie Regjonâl pe Lenghe Furlane (ARLeF), ma ancje naturalmentri il Stât, cui siei ministeris, i ents locâi, la Societât Filologjiche Furlane e chês altris associazions ch’a lavorin ta chest setôr. La conditio sine qua non pal sucès di une politiche lenghistiche svilupade par une comunitât regjonâl come chê furlane e je la concuardie tra i sogjets ch’a son in zûc, une concuardie che si fonde sul ricognossiment des competencis reciprochis e su l’assunzion di responsabilitâts precisis.