Control e monitorament di sot prodots de disinfezion cun parametris POX e UV-254 in aghis dal Friûl

Ristret

Chest studi al trate dal monitorament fat su 25 fonts di aghe potabile tal distret dal Friûl - Vignesie Julie. In cheste zone al samee che no sedin particolârs contaminazions des risorsis idrichis, ma salacor la disinfezion chimiche e i sot prodots de disinfezion (DBPs, Disinfection ByProducts) che si formin cu la clorazion a puedin sei considerâts potenziâi incuinants de aghe potabile. Il probleme de presince di sot prodots volatii de clorazion al è stât esaminât midiant dal parametri totâl POX (Organics alogjenâts eliminabii o spurgabii da l’aghe a mieç di gorgolament, Purgeable Organic Halogen), e il contignût di materiâl organic (precursôr dai DBPs) al è testât cul parametri surogât UV-254. La introduzion di chestis proceduris analitichis e à doi aspiets interessants, prin pe semplicitât de analisi e secont pe pussibilitât di previodi globalmentri il contignût totâl di organics alogjenâts te aghe potabile clorade. I campions di aghe a son stâts cjapâts tai sistemis di prese (fonts di mont e poçs in planure) par misurâ la contaminazion naturâl di organics alogjenâts de aghe e il monitorament di POX e je po stade fate ancje tes rêts di distribuzion. Te seconde fase dal studi chescj campions a son stâts clorâts par misurâ i parametris dal SDS-POX (POX tes rêts di distribuzion simuladis, Simulated Distributions Systems POX) e
dal POXFP (Formazion potenziâl di POX, POX Formation Potential). Lis misuris nus disin che no son contaminazions naturâls di POX te zone considerade e dome piçulis concentrazions di POX tai sistemis di distribuzion, bassis cuantitâts di SDS-POX ma cuantitâts misurabilis di POXFP che a metin in evidence la presince di potenziâi precursôrs di DBPs. Si è cjatade une curve di regression liniâr di corelazion jenfri POXFP e UV-254 che e conferme la relazion che e je jenfri chestis misuris di precursôrs dai organics
alogjenâts.