Giuseppe Calligaris (1876-1944): un neurolic antesignan de metapsichiche

Ristret

Fi di Giuseppina Stampetta e dal dotôr Domenico Calligaris di Magredis, Giuseppe Calligaris – destinât a deventâ un dai personaçs plui discutûts de Neurologjie taliane inte prime metât dal vincjesim secul – al nas a Fors di Sot (Udin), dulà che il pari al è miedi condot, ai 29 di Otubar dal 1876. Laureât tal 1901 in medisine cuntune tesi dal titul, che al anticipe i siei interès a vignî, Il pensiero che guarisce, tal 1902 si trasferìs a Rome come assistent dal Prof. Mingazzini. Lis primis publicazions a van daûr dai orientaments de ricercje neuropsichiatriche di chê volte: in particolâr, tal 1908 al presente une comunicazion ae Academie mediche di Rome dal titul La metamateria sensitiva spinale dulà che al sosten che la piel dal om e je dividude in liniis che a cjalin in cuatri direzions: orizontâl, trasversâl, oblicue drete e çampe. Il president de Academie Prof. Baccelli al nomenà une comission par verificâ i risultâts, che no vignirin confermâts; ad ogni mût al fo conseât al autôr di lâ indenant intes ricercjis. Tal 1909 al oten la libare docence in Neuropatologjie e in chel stes an al devente co-segretari dal Congrès de Societât dai Neurolics Talians. Simpri ta chel an al torne in Friûl, vierzint a Udin, adun cul pari, une “Casa di cura per malattie nervose e del ricambio”. Al partecipe ae prime Vuere mondiâl tant che uficiâl miedi, une esperience che i permetarà di publicâ Un medico e la guerra (1922). Tal 1927 al publiche I riflessi nelle lesioni del sistema motorio extrapiramidale che al sarà une vore doprât come test di studi. E je dal 1928 la leture ae Academie di Udin su Le catene lineari del corpo e dello spirito li che al teorize la presince su la superficie dal cuarp di cjadenis liniârs e plachis cutaniis che, se stimoladis in maniere oportune, a riclamin riflès cutanis internis (vissarâi) e cutanis psichics. Chescj sistemis cutanis a vegnin cjapâts dentri di un complès procès di radiazions universâls che a àn corispondence tal pinsîr de persone: e nas cussì la premesse pai studis di telepatie e dai fenomens metapsichics che a caraterizin l’ultin periodi de sô instancabile produzion sientifiche, lade indenant fin ae sô muart avignude a Magredis tal 1944.