Frecuencis lessicâls dal furlan scrit

Abstract

Cheste vore e nas dilunc de preparazion dal dizionari dal Coretôr Ortografic Furlan (COF) de Societât Sientifiche e Tecnologjiche Furlane. E propon il scandai des frecuencis lessicâls de lenghe furlane doprade intune sielte di scrits publicâts intai ultins doi agns e lis primis considerazions che i dâts a àn dât ocasion di fâ. Lis frecuencis a son stabilidis sul insieme des peraulis. Si resone parsore di carateristichis sistematichis de lenghe che la liste e met in lûs e su relazions dal lessic cjapât in cont cu lis normis grafichis. Pe lenghe furlane, fintremai al moment, analisis di cheste sorte no ‘nd è stadis publicadis, si che no je la pussibilitât di confrontâle cun voris parelis. Cheste stesse analisi e je parziâl; e je nome un prin contribût che si pense di podê slargjâ cun proceduris di elaborazion comparabilis o bielzà dopradis par altris lenghis e che a cjapin in cont il nivel sintatic che culì nol è scandaiât.