La energjie eletriche fotovoltaiche dal laboratori al implant finît. Une osservazion ai risultâts disvilupâts daspò il prin bant de Regjon Friûl Vignesie Julie

Abstract

La tecnologjie fotovoltaiche si sta rivelant in dì di vuê une des plui impuartantis fonts no esauribilis pe produzion di energjie eletriche. La ricercje di une conversion plui eficiente de energjie eletriche dal soreli zontraviers la piastrele fotovoltaiche e i programs di sparagn energjetic dai Stâts plui svilupâts a scomencin a produsi i prins risultâts, sedi tai laboratoris, dulà che si studiin lis leçs fisichis e i gnûfs materiâi par incressi la eficience, sedi inte inzegnerie là che si realizin progjets plui eficients. Tai ultins agns ancje inte nestre Regjon si scomence a lâ oltri la sperimentazion, metint adun implants convenzionai cun tecnologjiis plui afidabilis sui cuvierts di cjasis e capanons, par vie dal jutori dai contribûts publics. Di fat in Italie, de bande dal Ministeri dal Ambient e des Regjons, e je stade metude in vore une politiche di incentivazion titulade “10.000 cuvierts fotovoltaics” che e sburte la realizazion di implants cun tecnologjie fotovoltaiche disore costruzions privadis e publichis. La Regjon Friûl Vignesie Julie e à distribuît incentîfs cul imprest aministratîf dai bants, il prin tal 2001, il secont tal 2003 e il tierç tal 2005. Chel che in dì di vuê al è un piçul marcjât tai agns a vignî al cjaparà sù une fete simpri plui largje e al varà bisugne di gnovis figuris professionâls. Soredut e coventarà une progjetazion sapontade di un plan di racuelte dai dâts, par meti a disposizion di progjetiscj e produtôrs une prevision di valutazion dai investiments plui smicjade. A chestis esigjencis a varan di rispuindi: lis scuelis, lis universitâts, lis bancjis, lis istituzions locâls, ognidun cui siei mieçs e metodis. Il nestri grup, che si à dât il non “Agathos” al sta puartant indenant un progjet didatic di Educazion Sientifiche e Tecnologjiche (ES&T) secont l’implant di azion-ricercje e cu la partecipazion di tecnics e students par meti adun imprescj di prime man che a coventin par studiâ la produzion di energjie eletriche cul fotovoltaic e cun altris fonts di energjie. Il grup al à stabilît dai acuardis ancje cun istituzions di ricercje, universitâts, scuelis e aziendis privadis, e cualchidun dai components al puarte indenant consulencis pai Ents Locâi e pes aziendis che a metin in vore implants fotovoltaics. L’obietîf al è chel di meti in rêt la Scuele e furnî servizis didatics par incressi la educazion sientifiche e tecnologjiche. In chest articul si discutin i prins risultâts di cheste tecnologjie, ancje in considerazion des problematichis ancjemò di distrigâ, sedi sot dal aspiet sientific che di chel tecnic e economic, cirint di meti in evidence i valôrs dal ambient naturâl, de salût e dal sparagn energjetic.