Studi de formazion-distribuzion di clorît e clorât derivâts dal biossit di clôr intune rêt di distribuzion idriche: il studi di câs di Udin

Abstract

Par garantî la cualitât de aghe e evitâ la contaminazion bateriche tai Sistemis di Distribuzion de Aghe Potabile (SDAP), tai implants di tratament de aghe di bevi e ven fate une disinfezion. La concentrazion di disinfetant tai SDAP e cale cul timp, intant che, par vie des reazions chimichis cu lis sostancis disfatis te aghe, cul particulât, cul biofilm e cul materiâl des parêts dai tubis, e aumente la formazion di sotprodots de disinfezion (SPD). I metodis di disinfezion plui doprâts a son chei a base di clôr e se al ven doprât come disinfetant il biossit di clôr, come SPD si puedin produsi il clorît e il clorât. Chest studi al valute, cuntun model di simulazion (EPANET-MSX), la formazion e la distribuzion di clorît e clorât tal sisteme di distribuzion idriche di Udin, che al ven disinfetât cun biossit di clôr. Disponi di un model chimic-idraulic integrât al pues, di fat, miorâ la gjestion de rêt idriche sedi in cundizions standard sedi in cundizions particolârs. I risultâts otignûts cul model di simulazion a mostrin une diference minime cui valôrs di concentrazion misurâts sul puest, duncje si pues ipotizâ che a puedin jessi doprâts in variis cundizions par fâ previsions.