Un imprest par miorâ il lavôr tes primis trê etis dal cavalîr: progjetazion, definizion dal prototip, costruzion e prove di funzionament

Abstract

La sede e je une fibre proteiche gjavade fûr de galete produsude dal cavalîr (Bombyx mori) une vore lizere, lusinte, delicade a tocjâle, che e à une lungje durade e une grande afinitât cui colorants. In chest moment il 95% de sede produsude ator pal mont e ven de Asie, in particolâr de Cine, ma ancje li, aromai, la produzion e sta calant a vantaç des fibris sintetichis. Il sessante par cent di dute la plastiche doprade, come, par esempli, poliestar, poliamice, acrilic, e vie indevant, si cjate tai vistîts. Cuant che chescj vistîts a vegnin lavorâts in mût mecanic (come, par esempli, te laveblancjarie) a butin fûr un grum di chestis piçulis parts di plastiche, che daspò a finissin tes aghis, tal mâr e ancje tal aiar. Chest fat al à mot ducj i paîs a cirî di tornâ a doprâ lis fibris naturâls e a son tacadis une vore di ricercjis sientifichis par judâ a disvilupâ di gnûf la produzion e il marcjât de sede. Par judâ la rinassite dal setôr produtîf de sede, la regjon Friûl Vignesie Julie, midiant il PSR 2014-2020, e à finanziât il progjet “SILK”. Dentri di chest progjet, il grop di ricercje di Biosystem Engineering dal DI4A de Universitât dal Friûl al à cjapât sù la sfide di ideâ e progjetâ une gnove machine prototipâl par judâ il lavôr tes primis etis di disvilup dai cavalîrs. Il prototip, costruît pal arlevament dai cavalîrs tes primis trê etis di disvilup, al è un prin pas viers la ideazion e la progjetazion di imprescj che a aumentin la ergonomie e la produtivitât dal lavôr e che a puedin jessi doprâts ancje tes piçulis aziendis.