La struturazion de cjase e de cort in Friûl Propueste par un glossari

Abstract

Lis cjasis (e lis corts, stant che in Friûl lis cjasis da râr a vignivin fatis sù di bessolis e, par solit si cjatavin intun grop di costruzions, dopradis in part come abitazion e, in part, par ûs rurâl) a son simpri stadis impuartantis te culture furlane, tant al è vêr che, tal ambit de costruzion des cjasis e dai fabricâts atôr, si son disvilupâts une schirie di mistîrs (muredôr, cjarpentîr, marangon, e vie indevant) e une terminologjie cetant precise e detaiade pes struturis e pai materiâi. Il studi che o presentìn al intint dâ une prime rispueste a une domande: la cjase, la cort e lis costruzions rurâls in Friûl àno une lôr identitât, un lôr glossari leât ae etnie furlane o risintino di altris fatôrs no leâts ae specificitât etniche e ae lenghe furlane?