Lis minorancis linguistichis intal ordenament talian: disvilups normatîfs resints

Ristret

Cu la aprovazion intal parlament talian de Leç 482/1999 e je stade dade finalmentri aplicazion al principi stabilît dal articul 6 de Costituzion. Cumò al esist un imprest normatîf, che cun ducj i limits che al à il so test e cun ducj i condizionaments che e patìs la sô metude in vore, al è un imprest impuartant pe tutele des minorancis linguistichis intal stât talian. Chest risultât al è rivât dome daspò di oltri cincuante agns de jentrade in vore de Costituzion de Republiche. Chest al è sucedût ancje par vie des dificoltâts, a ducj i nivei istituzionâi, di dâ une definizion di minorance, e intal contest talian par vie de interpretazion restritive dai contignûts dal art. 6 de bande de Cort Costituzionâl, cu la distinzion fra minorancis ricognossudis e no ricognossudis e l’impediment aes regjons di inviâ iniziativis su chest cantin. La Leç e je rivade daûr dal sclariment teoric a nivel internazionâl, lis convenzions-cuadri dal Consei di Europe e la incressite de domande di tutele de bande des minorancis no ricognossudis che a àn cjatade la poie des autonomiis locâls e regjonâls. De 482/1999, des altris gnovis inziativis legjislativis statâls (par esempli la Leç 38/2001 pe minorance slovene) e regjonâls e ancje dai statûts dai ents locâi al ven fûr a clâr che la tutele no si limite ae pupilance dai patrimonis linguistics, ma e rivuarde dirits positîfs e duncje garanziis ativis sui ûs publics des lenghis des minorancis.