Autoorganizazion intai fluits

Abstract

In chest lavôr al ven mostrât cemût che i sistemis dinamics di grande complessitât a presentin manifestazions di transizions autoorganizadis. Intal particolâr si analize il strât licuit che al dipent dal gradient termic. La descrizion di chescj complicâts sistemis e pues sei fate doprant leçs no liniârs, circuits a feedback o a feedforward, e v.i. L’andament dai fluits al ven descrit mediant lis ecuazions di Navier-Stokes, Fourier e Fick che a presentin elements evolutîfs no liniârs. Lis ecuazions di evoluzion no liniâr a puedin descrivi no nome i moments cuant che a scomencin andaments e ondis, ma ancje la pussibilitât di andaments caotics e di turbolencis. I andaments caotics a puedin puartâ a la impussibilitât di vê previsions a lunc tiermin, come intal câs des previsions atmosferichis plui in là di cualchi zornade.