Un troi dal mâr al cîl: studi dal paisaç ator dal disvilup dal troi di Aquilee (troi Celest)

Abstract

I pelegrins, lant ator pe Europe, tai secui passâts a àn disegnât, tal timp, da lis stradis che a coleghin storiis, paisaçs, culturis diferentis, popui. Cumò chestis stradis, che a traviersin boscs, monts e paisaçs rurâi, a puedin jessi la ocasion pal disvilup di un turisim in acuardi cul ambient soredut tes areis agriculis e mancul cognossudis. Il studi che achì al ven presentât al cjape in considerazion il Troi di Aquilee (cognossût ancje cul non talian di Cammino Celeste), un percors, lunc cuasi 200 km, che al partìs di Barbane, te lagune di Grau e al rive fin sul Lussari permetint ai escursioniscj di traviersâ i diferents paisaçs naturâi e culturâi dal Friûl Vignesie Julie. Par burî fûr chest lavôr a son stâts doprâts indiçs di cemût che al ven doprât il teritori, imprescj di valutazion come l’ECOVAST e lis tecnologjiis dal Geographic Information System. I risultâts a àn metût in lûs cemût che al cambie il paisaç dilunc il percors dal troi: paîs, ambients naturâi, terens agricui e la lôr diferente presince partint de plane fintremai aes monts. Chescj risultâts a àn puartât a elaborâ la “Mape dal Paisaç”, un imprest une vore impuartant par miorâ la cognossince dal teritori e sostignî il turisim leât a lis aziendis agriculis o ai bed & breakfast tes zonis dulà che al passe il troi