Valutazion dal disvilup lenghistic in fruts bilengâi furlan-talian

Abstract

Cheste vore e presente une indagjin valutative dal disvilup lenghistics di fruts bilengâi furlan-talian, otignude cu la soministrazion di provis che a analizin sevi lis capacitâts di comprension sevi chês di produzion in ogniune des dôs lenghis. Si à doprât une sielte di provis tiradis fûr di une batarie di tests destinâts a valutâ i disturps lenghistics di fruts di talian come prime lenghe. Si àn studiât 8 subiets sielts tra fruts di prime elementâr. Si è lâts a viodi in particolâr cuale che e je la lenghe dominante e dulà che si verifichin pal plui lis influencis interlenghistichis. I dâts tirâts sù a mostrin che dome in 1 câs si pues fevelâ di dominance dal furlan a ducj i nivei; par cualchi subiet la dominance dal furlan e je rilevade dome a nivel di comprension e no di produzion e in gjenerâl la plui part dai fruts a puedin sei considerâts bilengâi belançâts, cu la tindince plui o mancul marcade a alternâ e a miscliçâ lis dôs lenghis. Cundiplui, i dâts a fasin viodi che i nivei di competence in ogniune des dôs lenghis a son dal dut comparabii cui valôrs medis di riferiment valevui pai monolengâi. Si regjistre ancje che l’inflùs dal furlan sul talian al è une vore fuart in ambit lessicâl. Di chê altre bande si viôt che il furlan nol risint de influence dal talian intal ambit de morfosintassi e che, al contrari, cualchi volte e je propit la lenghe furlane a influî struturalmentri sul talian. Stant che nol è râr che une lenghe minoritarie o regjonâl (come il furlan) e risinti a nivel di vocabolari de influence de lenghe maioritarie e plui prestigjose, a partî de osservazion dai dâts tirâts sù si ipotize che la talianizazion dal lessic e rapresenti un fenomen che nol rivuarde dome il furlan dai plui zovins ma ancje il lengaç dai adults.