Problemis di riorganizazion teritoriâl a nivel NUTS-2: cualchi riflession su esperiencis fatis in Friûl Vignesie Julie

Abstract

L’obietîf principâl di chest articul al chel di proponi cualchi riflession gjenerâl sul probleme de riorganizazion teritoriâl di une regjon ae lûs dai insegnaments dal professôr Marzi Strassolt, in particolâr lant daûr de sô idee che il teritori, tal creâ un model statistic, nol à di jessi tratât dome tant che un vincul spaziâl di sodisfâ o une semplice ipotesi scontade. In chest sens, si cjate tal so pinsîr une sorte di primât dal teritori, che nol va intindût dome tal sens de sô capacitât di modificâ lis manifestazions dai fenomens socioeconomics, che ancje “a paritât di cundizions” a puedin cambiâ di teritori in teritori, ma ancje tal sens di fâ capî, cul insiemi des sôs relazions orizontâls e verticâls, che ciertis modelistichis proponudis te leterature a son dome in part justis pe cuistion regjonâl studiade. Cheste vision transdissiplinâr, za presinte tal so pinsîr ae fin dai agns Otante, no jere par nuie comun pai statistics, ancje economics, di chê volte e si à cuasi dal sigûr di riferîle ai siei prins interès sientifics che a integnin plui la Gjeografie Economiche che la Statistiche. No par nuie al pensave che par studiâ a fonts un fenomen che al interessave un teritori si ves bisugne di competencis sientifichis diviersis, dispès a cjaval jenfri plui setôrs dissiplinârs. Anzit lui al notave simpri plui la dibisugne di figuris interdissiplinârs, sei tal setôr professionâl sei in chel academic (che in chest câs i plaseve definî ricercjadôrs “di frontiere” zuiant in mût implicit su la posizion gjeopolitiche dal Friûl Vignesie Julie) in stât duncje di vê une vision ampie che e va di là dal confin dai singui setôrs dissiplinârs. No a câs al fo grant sostenidôr dai cors di lauree (trienâl e magjistrâl) in Statistiche e Informatiche pe Gjestion des Impresis li de Universitât dal Friûl, doi cors che, come che si pues capî cun facilitât de lôr denominazion, si fondavin su trê competencis ben difarentis e che a formavin figuris professionâls cetant preseadis par un teritori cuntune struture economiche fate, istès di chê nazionâl, di impresis piçulis e medis Chest lavôr al concentre la atenzion sui esercizis di riorganizazion teritoriâl fats in Friûl Vignesie Julie par mieç de Cluster Analysis, strument classic di analisi statistiche multivariade. A vignaran proponudis ciertis considerazions, tiradis fûr des diviersis esperiencis empirichis fatis sul cjamp vie par une dade di timp di plui di vincj agns, che a integnin lis principâls decisions che un ricercjadôr al à di cjapâ cuant che al tache a fâ la analisi, come chês relativis ae metriche, ae strategjie di agregazion e ae eventuâl introduzion di un vincul di contiguitât. In particolâr, par chel che al inten chest ultin pont, par vie des sôs fuartis criticitâts metodologjichis, a vignaran furnîts sugjeriments par doprâ i indicatôrs di direzion privilegjade dal fenomen studiât