La aplicazion des pratichis di gjestion integrade dal risi di imprese: cualchi dât riferît a impresis di grandis dimensions in Italie

Abstract

Chest studi esploratîf al ripuarte i risultâts di une ricercje che o vin condusût su lis pratichis di gjestion integrade dal risi di imprese (enterprise risk management – ERM) metudis in vore da lis grandis impresis talianis che a operin tal setôr de manifature e in particolâr su la fase di identificazion dal risi e su l’ûs di tecnichis sofisticadis di valutazion dal risi. La ricercje e cjape dentri un campion di 58 grandis impresis. I risultâts a àn metût in lûs che plui da la metât da lis impresis che a àn cjapât part a la ricercje a àn za tacât a meti in vore o a son daûr a tacâ a meti in vore la gjestion integrade dal risi di imprese. Cun di plui, la maiorance da lis impresis che a àn partecipât al scandai e ponte in maniere esplicite la atenzion sui events potenziâi che a puedin vê une influence su la performance e su la capacitât di rivâ ai obietîfs de imprese, e, tal sfuarç di identificazion dal risi, ognidune da lis fonts di risi strategjic (risi di operazion, risi di riduzion di valôr, risi di competizion, risi di reputazion) e je percepide come di grande impuartance. La analisi che o vin puartât indenant su l’ûs di tecnichis sofisticadis di valutazion dal risi e met in lûs che chestis tecnichis a son adotadis a un nivel significatîf da lis impresis – tra chês che a àn partecipât a la ricercje – che a dimostrin une atenzion specifiche viers lis fonts di risi strategjic. Tal specific, o vin viodût che lis impresis a doprin tant tecnichis cuantitativis che tecnichis cualitativis, e chest al sugjerìs che sedi i risultâts otignûts doprant modei cuantitatîfs e no cuantitatîfs sedi la valutazion gjestionâl implicade tal ûs di mapis dal risi a vedin un rûl clâf te stime de probabilitât e dal impat dai events di risi. Dut câs, a lis tecnichis sofisticadis al ven cuasi simpri atribuît un grât di impuartance moderât. Di fat, come che al ven ricognossût ancje de leterature, a son dai events che al è un grum dificil previodi ce sorte di impat che a varan. Il limit principâl di chest studi al è che dal numar di impresis che a costituissin il campion, par chest motîf il nestri al è un studi di nature esplorative. Par sapontâ la validitât dai risultâts otignûts e par capî miôr fin a ce pont che a puedin jessi gjeneralizâts, si varès di ripeti la indagjin cun campions plui grancj