La meditazion orientade a la mindfulness (MOM) inte ricercje mediche e psicologjiche

Abstract

La meditazion mindfulness e costituìs il sietim pont di un troi cun vot stazions. Si trate di un program psicopedagogjic par liberâsi dal dolôr fisic e psichic metût adun plui di 2500 agns indaûr di Siddharta Gautama, un princip indian cognossût come il Buddha. Gautama al à insegnât cemût praticâ la mindfulness intal Grant discors sui fondaments de presince mentâl. L’obietîf di cheste meditazion al è chel di imparâ a diventâ cussients dal propri respîr, dal cuarp e imparâ a cjalâ cun atenzion ce che al capite inte nestre ment. Il metodi di meditazion orientade a la mindfulness (MOM) metût adun dai autôrs al è organizât in vot setemanis. Par ogni setemane al ven fat un incuintri di 2 oris. I prins 30 minûts dal incuintri a vegnin doprâts par spiegâ un concet impuartant pe mindfulness; daspò si medite par 30 minûts (10 minûts puartant la atenzion sul respîr; 10 puartant la atenzion sul cuarp e 10 minûts cjalant ce che al sucêt jenfri la ment). A la fin de meditazion si discutin i risultâts e lis dificoltâts de meditazion par 60 minûts. I autôrs a àn doprât chest metodi par puartâ indenant 6 ricercjis publicadis a nivel internazionâl e altris cuatri in cors di publicazion. Intai prins doi studis e je stade studiade la rapresentazion neuronâl de meditazion MOM, in particolâr chê leade a la cussience dal cuarp (Tomasino e Fabbro 2016; Tomasino et al. 2016). Intes secondis dôs ricercjis a son stadis studiadis lis modificazions de personalitât daspò un cors di meditazion (Campanella et al. 2014; Crescentini et al. 2014). Intes ultimis dôs publicazions al è stât studiât l’efiet de mindfulness su lis personis cun dipendence alcoliche e la utilitât dal training MOM in fruts di siet-vot agns (Crescentini et al. 2015a e 2016)