La gjestion sostignibile des aghis di ploie: analisi de zone industriâl di Buje-Osôf (Ud)

Abstract

Lis aghis di ploie no rapresentin dome un probleme par vie de cuantitât di licuit che al è di scjariâ tes fognaduris, ma si à di stâ atents ancje ae cualitât di chestis aghis che, lavant lis superficiis impermeabilis, a puartin cun lôr grandis concentrazions di sostancis incuinantis. L’obietîf di chest studi al è chel di valutâ lis pussibilitâts di calcul che al furnìs il program EPA SWMM 5.0 par modelâ il fenomen dal first foul flush, che tradot al vûl dî che tes primis aghis che a rivin tai depuradôrs al è contignût dut il sporc depositât sui asfalts, sui plaçâi dai par- chegjos o des fabrichis. Prime di tacâ a modelâ al è stât une vore util capî cualis che a son lis metodologjiis in ûs in dì di vuê e su ce principis che si fondin. In so- stance si à cirût di studiâ il probleme des aghis di ploie in maniere slargjade do- prant basis teorichis, esperiencis pratichis e modei numerics.

Il câs che al è stât cjalât di dongje al è chel dal CIPAF (Consorzio per lo Svilup- po Industriale ed Economico della Zona Pedemontana Alto Friuli). In cheste zo- ne industriâl il dilavament dai plaçâi di lavorazion al è pardabon un probleme impuartant, parcè che lis produzions des ditis a puartin cuantitâts no trascurabi- lis di materiâi tal implant di depurazion, che al va in crisi cuant che al plûf. Cen- ce lâ a esaminâ tal detai lis carateristichis dal depuradôr, il studi al à cirût di me- ti jù un model che al descrivedi il traspuart des sostancis di lavorazion dentri tes fognaduris, provant a capî in ce maniere che chestis sostancis a rivin, cun rispiet ai pics di puartade, tal depuradôr. A chest pro al è stât doprât un model di ploie za tarât daûr des cuantitâts, zontant resonaments e considerazions par simulâ il moviment des sostancis incuinantis dai plaçâi o dai tets, dentri de rêt di coletôrs dal consorzi industriâl.