Ricercje su la condizion socio-lenghistiche dal furlan

Abstract

La motivazion de indagjine e je chê di verificâ e rilevâ i ategjaments, lis opinions e l’ûs de lenghe furlane, ancje cul fin di furnî un util contribût ai progjets di elaborazion di adeguâts struments e struturis pe conservazion, difusion e pal so insegnament. Si à cirût di meti in lûs lis funzions dai diviers codiçs lenghistics, identificadis par mieç dai compuartaments e dai ategjaments dai sogjets dal campion. Par cheste ricercje si à sielzût di doprâ un cuestionari, sometût a 463 personis jenfri i 18 e i 65 agns in 32 comuns dal Friûl: l’aree gjeografiche cjapade in considerazion e jere compagne di chê de ricercje dal 1978, e ancje i comuns che di chê aree a son stâts tirâts fûr a jerin simpri chei, tant di podê mantignî in dì di vuê i stes nivei di rapresentativitât che a son stâts garantîts in chê volte. Il grup dai intervistadôrs al jere formât di students universitaris e di neo-laureâts bilengâi, di mût che a fossin bogns di someti il cuestionari te lenghe sielzude dai intervistâts: 1/3 di lôr al à rispuindût par furlan. Un dai risultâts plui impuartants al è che il 57,2% dai intervistâts al fevele regolarmentri par furlan; cundiplui, la cognossince almancul passive di cheste lenghe e rivuarde il 97,4% dal campion. Cjapant in considerazion dome la int che e fevele regolarmentri par furlan, il “çucul dûr” de popolazion furlanofone residente in Friûl, al è di cirche 430.000 personis: a chestis si varessin naturalmentri di zontâ i furlanofons residents in altris areis de Regjon (te Vignesie Julie), tal rest di Italie e dal mont. Tal passât, l’ûs dal furlan inte famee al balinave jenfri il 61,3% e il 48,6%, in dì di vuê, jenfri il 50,8% e il 32,2%. L’ûs di cheste lenghe al è une vore disferenceât inte stesse famee: il 50,8% dai intervistâts al fevele par furlan cui gjenitôrs, ma dome il 34,6% cui fîs. Dut câs, dal confront di une vore di dâts di cheste ricercje e di chê dal 1978, si pues rimarcâ cemût che il furlan al sei daûr a pierdisi cuntune ande di cirche l’1% ad an. Il furlan al è viodût massime tant che “lenghe dai rapuarts primaris”, adate par mantignî i leams di amicizie e comunitaris, ma dome il 50,1% dal campion lu considere tant che “lenghe dal cûr”, chê che si è plui leâts o che si ame di plui. Cundut che, la plui part dai intervistâts e je in cunvigne cul bilenghisim talianfurlan, massime par resons di tradizion e culture, e al è cuasi plebissitari (96,3%) l’acuardi cu la propueste di insegnament di storie, culture e tradizions furlanis inte scuele, e une vore alt (85,5%) ancje l’acuardi al insegnament de lenghe furlane, cun risultâts, fra l’altri, cuasi compagns di chei des ricercjis dal passât.