La gjestion otimâl de pression intes rêts di acuedot: aument de eficience di gjestion e riduzion dai coscj energjetics

Abstract

In chest document o considerìn il probleme de gjestion de pression intai sistemis di distribuzion di aghe potabile, di mût di ridusi la energjie doprade des pompis, la cuantitât di aghe straçade pes pierditis e il numar di riparazions che bisugne fâ sui tubui. Dopo di une piçule introduzion descritive dal probleme e des cundizions al contor, o presentìn une metodologjie basade su algoritmis gjenetics (AG) a obietîf singul e multipli che, partint dal model numeric de rêt, e fâs la calibrazion dal model e daspò e cîr la posizion otimâl e la regolazion des valvulis di riduzion de pression (VRP), su la fonde di restrizions operativis che a scuegnin sei sodisfatis. In particolâr, il model di simulazion al ven calibrât midiant di un AG a codifiche reâl a obietîf singul, par otignî di une bande i valôrs dai coeficients di scabrece dai tubui e di chê altre une valutazion de ripartizion de puartade alimentade inte rêt jenfri aghe distribuide pardabon a lis utencis e aghe dissipade traviers des pierditis de rêt. L’algoritmi multi-obietîf NSGA-II al è stât implementât par cirî lis soluzions otimâls tal sens di Pareto, che a rapresentin plusôrs nivei di compromès jenfri cost di instalazion des VRP e riduzion des pierditis. La aplicazion de metodologjie a une rêt idriche reâl e à permetût sparagns significatîfs di energjie e di aghe, come che al è stât mostrât dal control dal sisteme. Cun di plui si son evidenziâts altris doi vantaçs: il numar di riparazions dai tubui si è ridusût a mancul di mieç pe riduzion dal regjim des pressions, permetint cussì al gjestôr di furnî un servizi plui eficient e afidabil; la aghe prevanzade e ven mandade intune cistierne di dipuesit che e rifurnìs une rêt idriche alimentade di pompis, sparagnant cussì une vore di coscj di pompe.