Il strument “incentîf” a pro des agroenergjiis tai documents di programazion dal svilup rurâl in Friûl Vignesie Julie

Abstract

In chest studi a son presentâts i risultâts di une ricercje che e à interessât la analisi dal strument economic “incentîf” a pro des bioenergjiis che a provegnin des culturis agriculis. Inte prime part dal lavôr si incuadre il strument economic incentivant doprât par svilupà lis ativitâts agriculis destinadis aes bioenergjiis. Dopo di une prime, sclagne, rassegne des misuris dopradis dal decisôr public par favorî l’ûs des agroenergjiis, il studi al cjape in considerazion la impuartance dai paiaments a favôr dai servizis ambientâi creâts dai imprenditôrs agricui cuant che a produsin lis agroenergjiis. La seconde part dal studi e analize i incentîfs pes agroenergjiis presentâts tai Documents di programazion pal Svilup Rurâl de Regjon Autonome Friûl Vignesie Julie 2000-2006 e 2007-2013, par cirî di capî come che si son evolûts.