Su la origjin da la teorie de cuantizazion de radiazion eletromagnetiche di Einstein

Ristret

Il fondamentâl lavôr di Einstein dal 1905 su la cuantizazion de radiazion eletromagnetiche al è storichementri interpretât come l’at di nassite de fisiche moderne. L’An Internazionâl de Fisiche tal 2005 al è stât une grande ocasion par scrusignâ i aspiets di contignût dissiplinâr e di profondiment storic, rivuart ai lavôrs di Einstein dal 1905. In particolâr chest contribût al cîr di rispuindi, traviers une rivisitazion dal articul dal 1905 di Einstein, a cuâi che a son i trats distintîfs de sô gjenialitât. Il lavôr plurilengâl che al è stât fat nol va fûr di cheste otiche. Confuartâts des resintis concuistis des neurosiencis, prime di rivâ a voltâ il test in lenghe furlane, si è volût partî dal test origjinâl cul intindiment di furnî un prodot culturâl e di ricercje che di une bande al dedi un jutôri ai progjets di comunicazion dissiplinâr tes secondis lenghis, e di chê altre al rapresenti un esperiment di cemût che la comunicazion plurilengâl e sedi un stimul par cjapâ sù lis novitâts e par cjatâ gnovis soluzions. In fin o vin volût provâ a fâ un lavôr di valorizazion linguistiche pe lenghe furlane, doprant concets alts e sfidant i tancj che a pensin che chest al sedi pussibil dome doprant lenghis di grande difusion.