Il malstâ emozionâl dai fruts cun disturps specifics dal lengaç. Cemût che lu percepissin i gjenitôrs

Ristret

Tai fruts cun disturps specifics dal lengaç il malstâ emozionâl al è un probleme che al pâr zontâsi al prin e pandisi intes situazions là che chescj fruts a son in contat cui lôr coetanis normodotâts. Cheste ricercje e scrutine chest malstâ emozionâl fasint stât su la percezion che indi àn i gjenitôrs e che e ven rilevade mediant la CBCL/4-18 Children Behavior Checklist/4-18 di M.T. Achenbach. Il studi al rivuarde fruts talians cun DSL, che a van ae scuele de infanzie e ae scuele primarie. Si va a individuâ i sintoms dal malstâ emozionâl, la lôr intensitât e la lôr frecuence, fasint un confront cui dâts rigjavâts di un grup di control di fruts normodotâts de stesse etât. I risultâts che si rivin a vê a mostrin che in chest grup di fruts cun DSL il malstâ emozionâl al è presint e che i lôr gjenitôrs lu percepissin significativementri di plui di ce che al capite pai fruts normodotâts. Si viodin difarencis di cualitât e di cuantitât de percezion che indi àn lis maris rispiet ai paris e che ducj i doi i gjenitôrs dai fruts cun DSL a rilevin problemis di atenzion intai fîs.