Comprension e produzion de sintassi intai fruts bilengâi furlan-talian e talian-furlan di 6 e 7 agns

Ristret

In chest lavôr o vin studiât il disvilup de comprension e de produzion sintatiche in 7 fruts bilengâi Furlan-Talian di 6 e 7 agns. Doi a son i obietîfs dal lavôr: 1) valutâ lis abilitâts sintatichis inte produzion e inte comprension; 2) verificâ se intal contâ une storie i fruts a doprin dome lis struturis sintatichis che a cognossin miôr o ben se a “riscjin” la produzion di struturis sintatichis che ancjemò no cognossin ben. I risultâts a mostrin che i fruts di prime elementâr a àn une comprension de sintassi une vore simil par Talian e par Furlan, mentri che i fruts di seconde a mostrin un grant miorament pal Talian ma no pal Furlan. Chest fat si pues atribuî a la cussience metalinguistiche cjapade sù inte scuele taliane. Il compit naratîf al somee sburtâ i fruts a doprâ dome lis struturis sintatichis che a cognossin perfetementri.