Modei matematics par implants di depurazion: primis aplicazions in Friûl

Ristret

Il tratament biologjic de aghe di fogne di origjin civîl o industriâl, prime di scjariâle intai flums o in altris cuarps idrics, al è il sisteme plui comun par eliminâ o minimizâ l’incuinament. I sistemis plui cognossûts pal tratament des aghis refluis a son i procès a pantan atîf. Il tratament biologjic cun pantan atîf al gjave lis sostancis disfatis, organichis e inorganichis e al cagle i solits coloidâi e no sedimentabîi mediant l’azion dai microrganisims che a costituissin il pantan. Il studi dai procès biochimics implicâts tal tratament biologjic des aghis al à permetût l’evoluzion di un gnûf mût di progjetâ: la modelistiche. In chest articul si fasarà une introduzion a la teorie matematiche che e sta daûr dal model e daspò si ilustraran un pôcs di câs là che i modei a son stâts aplicâts tal concret. I microrganisims che a costituissin il pantan a son clamâts biomasse mentri i incuinants a son clamâts ancje substrât. A la biomasse si è permetût di cressi doprant i incuinants come risultive di carboni e/o di energjie, gjavant chei incuinants dal reflui par convertîju in gnove biomasse, H2O e CO2. A son diferents gjenars di microrganisims classificâts in eterotrofs e autotrofs a seconde che a doprin come acetôr di eletrons l’ossigjen o la sostance carboniche. Lis principâls sostancis incuinantis che si tirin fûr cui trataments biologjics a son i composcj carbonics, l’azôt e il fosfar. Al è une vore di agns che diviers centris universitariis e di ricercje ator pal mont si interessin di chest argoment. In particolâr il Task Group de I.A.W.Q. (International Association on Water Quality) al à metût adun intal 1987 l’Activated Sludge Model N. 1 (model pal pantan atîf) che al è stât un grum aplicât dimostrant la sô validitât e afidabilitât. L’A.S.M. N. 1 al cjape in considerazion la rimozion dal carboni e dal azôt. Daspò a son stâts elaborâts modei simpri plui complès che a considerin ancje la rimozion dal fosfar, l’A.S.M. N. 2 e N. 3. Di cualchi an incà ancje il dipartiment di Chimiche de Universitât di Udin si sta ocupant de aplicazion modelistiche a la progjetazion/gjestion dai implants di depurazion. Par lis nestris esperiencis o vin doprât l’A.S.M. N. 1, esplicât in chest articul.