La impuartance de esperience cui fruts pe formazion professionâl dai mestris de scuele primarie

Ristret

La leterature de ricercje e à dimostrât in maniere esauriente che la formazion dai insegnants e à di cjapâ dentri la analisi des propuestis didatichis, dai struments e dai metodis propris de materie par fâ in mût che e sucedi chê curvadure che e permet il passaç da la cognossince a la competence, cussì che il futûr insegnant al savedi creâ ambients di aprendiment dulà che il coinvolziment personâl dai students al sedi valit rispiet ae paronance dai diviers argoments. Il model che al integre lis modalitâts Metaculturâl, Esperienziâl, Progjetuâl e Situade, che al è stât studiât e sperimentât intai ultins 20 agns dentri dal Cors di Didatiche de Fisiche (CDF) de Universitât dal Friûl pe formazion dai futûrs insegnants, si è mostrât valevul rispiet al passaç di apropriazion de materie, da la cognossince a la competence che e permet a cui che al deventarà un docent di savê creâ ambients di aprendiment dulà che il coinvolziment personâl dai arlêfs al risulti eficaç. In chest model la fase Situade, di implementazion intes classis di percors progjetâts dai futûrs insegnants, e zuie une part impuartante sedi pal docent in formazion o in servizi, sedi pe introduzion a scuele di inovazion didatiche e materiâi che si fondin su la ricercje. Il model al previôt un micro aprendistât tal contest scolastic su la educazion sientifiche, tal câs specific la fisiche, bon di produsi colegament e colaborazion tra scuele e Universitât su doi plans: di une bande la condivision de valutazion des competencis otignudis dai insegnants in formazion e, di chê altre, l’apuart di inovazion didatiche e dal svilup professionâl dai insegnants in servizi che al derive dai percors didatics e dai materiâi fondâts su la ricercje. L’Aprendiment Situât, produsût da lis esperiencis sul cjamp realizadis in classe e dal monitorament e analisi dai percors e dai risultâts di aprendiment dai fruts, al permet di consolidâ la competence professionâl che si complete cu la riflession e la valutazion di dut il percors formatîf de bande dai futûrs insegnants. La responsabilitât inte realizazion e inte valutazion dai Modui di Intervent Didatic intal contest dal cors di Didatiche de Fisiche, e à produsût un gnûf model di colaborazion istituzionâl tra la universitât e la scuele. In chest model si realize la triangolazion tra il Cors, il Laboratori e il Tirocini, integrazion che si realize midiant Modui di Intervent Didatic (MID) inovatîfs, fondâts su la ricercje didatiche pe educazion sientifiche te scuele primarie. Cheste impostazion e à, cun di plui, incoragjât la integrazion de professionalitât dal docent espert cun chê dal docent in formazion. In chest contribût al ven analizât l’impat su la scuele dai intervents didatics che a àn viodût la partecipazion, dilunc di 3 agns, di 360 insegnants in servizi e ancjetancj insegnants in formazion.