Migrazions internis e internazionâls in Friûl Vignesie Julie tal secont dopovuere

Ristret

I compuartaments demografics, pal solit, a cambiin dome par grâts, a part cuant che a son condizionâts di shock esternis. La Seconde vuere mondiâl e rapresente un di chescj shock. Il stât di vuere al puartà a une flession dal numar dai nassûts e ancje i matrimonis a forin di mancul, la mortalitât invezit e cressè. Une volte finît il stât di vuere, la riprese de solite dinamiche demografiche e fo precedude di une serie di sestaments: dopo de diminuzion e fo une riprese des nassitis e dai matrimonis. Par chel che al inten il Friûl e la Vignesie Julie, il tornà aes cundizions di normalitât al segnà ancje une riprese des migrazions sedi internis che internazionâls. L’obietîf di chest lavôr al è chel di proponi une stime dai flus migratoris che a àn vût origjin tal Friûl Vignesie Julie tal secont dopovuere e di metiju tal contest demografic dal periodi.