Il “model Friûl” e lis ricostruzions dopo taramot modernis tal bacin dal Mediterani: al inizi di une prospetive endogjene e ecologjiche

Ristret

Lis ricostruzions dopo taramot a puedin deventâ pieris miliârs fondamentâls tes “siencis dal teritori” parcè che nus dan la pussibilitât di imparâ une vore no dome su lis resons fondamentâls de prevenzion dal risi, ma ancje su la evoluzion dal rapuart tra pinsîr uman, teritori e nature. La ricostruzion di Grammichele te Val di Noto, in Sicilie, dopo dal taramot dal 1693, e je un esempli impuartant di ricostruzion pre moderne, impen il câs de ricostruzion di Lisbone, dopo dal taramot dal 1755, al rapresente la essence de citât moderne europeane capitaliste. La ricostruzion di Messine, daspò dal taramot dal 1908, e inaugure la storie contemporanie taliane des “ricostruzions cence fin”, in cualchi maniere, un tornâ aes situazions pre modernis. Dopo de Seconde vuere mondiâl, tai agns Sessante dal secul passât, a forin fatis lis ricostruzions “tart modernistis” di Agadir in Maroc e di Skopje in Macedonie (po Jugoslavie). Altris câs esemplârs di ricostruzion a son chei di Longaron daspò dal disastri idrogjeologjic dal Vajont dal 1963: «dulà che al jere ma no cemût che al jere» e chel di Gibellina, daspò dal taramot dal Belice tal 1968: «ni dulà che al jere, ni cemût che al jere». Il câs dal Friûl, dopo dal taramot dal 1976 al rapresente un moment di svolte te storie des ricostruzions modernis dal dopo taramot: al segne l’inizi di un gnûf mût, endogjen e ecologjic, di progjetâ lis ricostruzions. Il primum movens dal “Model Friûl” al è probabilmentri il fat che il model al à metût tal centri de ricostruzion i valôrs “microcosmics” di lûc, lavôr e abitazion come rapresentatîfs de complessitât dal insiemi. Il “model Friûl” al è un model di grant sucès. Ma, magari cussì no, al è restât un câs isolât par vie che il stât centrâl al cîr simpri di slargjâ l’esercizi dal so podê dal moment de emergjence al “grant afâr” de ricostruzion.