Lenghis minoritariis e compuartament: il câs des minorancis slovene e furlane in Italie

Ristret

Une piçule revision de leterature e à marcât che: 1) il compuartament di une persone al è influençât sedi da la lenghe che e fevele sedi da lis lenghis dopradis dai media; 2) il fat che une lenghe e sedi maioritarie o minoritarie al influence il so impat sul compuartament; 3) nol è dit che l’efiet di une lenghe sul compuartament di une popolazion al sedi il stes di chel su di une altre popolazion; 4) lenghis diferentis a puedin vê efiets diferents; 5) i studis su lis lenghis minoritariis a esistin ma a son pôcs. Il scopo di chest lavôr al è stât chel di verificà se lis lenghis di dôs minorancis linguistichis (slovene e furlane) a contribuissin a determinà compuartaments diferents di chei da la maiorance linguistiche (taliane). Di un campion di 1080 consumadôrs talians a son stâts estrats 4 sot campions omogjenis par gjenar, etât, titul di studi e redit pro capite ma diferents par minorance linguistiche e lenghe fevelade. In particolâr slovens che a fevelin sloven, furlans che a fevelin furlan, furlans che no fevelin furlan e altris talians di nissune minorance e che no fevelin ni sloven ni furlan. Par chescj sogjets a son stadis confrontadis lis mediis di vot antecedents dal compuartament: Advertising Involvement (Message Involvement, Media Involvement, Behaviours); Price Consciousness; Environmental Concern; Moral and other-orientated Reasoning; Time Management e Time Pressure. Par cuatri antecedents no je risultade nissune relazion cu lis lenghis minoritariis; par altris cuatri invezit e je risultade une relazion. In particolâr a son risultadis diferencis significativis jenfri: 1) sogjets che a fevelin une lenghe minoritarie e sogjets de maiorance linguistiche; 2) sogjets di une minorance che a fevelin la lenghe minoritarie e sogjets da la stesse minorance che no fevelin la lenghe; 3) sogjets di minorancis diferentis sedi che a fevelin sedi che no fevelin lis rispetivis lenghis minoritariis. Si à concludût che lis lenghis minoritariis a puedin influençâ ancje compuartaments che, in aparence, no àn nie a ce viodi cu lis lenghis come, par esempli, chei relatîfs a la tutele dal ambient e chei che a àn consecuencis etichis. Ae fin, al ven evidenziât che studiâ i ategjaments viers une lenghe minoritarie sedi da la minorance linguistiche sedi da la maiorance e lis relazions di cause e efiet tra ategjaments e compuartament e je une cundizion impuartante par impostâ une politiche linguistiche eficace