L’arlevament di pes tes vals des marinis di Maran e Grau: aspiets storics e carateristichis di produzion

Ristret

L’arlevament di pes intes vals des marinis furlanis (valiculture) al è un sisteme di culture acuatiche une vore vieli, stant che bielzà intun document dal 1564 a jerin presints dai arlevaments intes aghis di mâr dongje di Maran. Cu lis bonifichis des tieris de plane furlane intai agns Vincj, il numar e la grandece des vals presintis te nestre Regjon a son lâts jù a sec. Lis carateristichis principâls des vals di Maran a son il lôr jessi piçulis, il cjatâsi dongje dal paîs e la forme a pietin, cun canâi a scuare che si lein midiant di un canâl principâl aes sclusis sul mâr. Lis vals di Grau a son sparniçadis par dute la aree de marine, a son plui grandis di chês di Maran e a mostrin la struture tipiche des vals dal Venit, cuntun bacin grant e forme iregolâr. Chescj implants a àn tant che limits la mancjance di oms che ju savedin gjestî, i presits bas dai prodots, i parons che no son bogns di doprâ politichis di marketing, la presince di uciei che a mangjin il pes e il scambi scjars di aghe des vals ae marine.