Intervents len-len a sec par rinfuarcâ i solârs in len

Ristret

Cetantis voltis al covente fâ intervents par rinfuarçâ i solârs di len par vie che a àn pocje rigjiditât te flession, che e determine vibrazions sot di carics di esercizi e frecis altis. Chestis, pe viscositât dal len, a puedin rivâ a valôrs critics. Si sa cun di plui che tai edificis in modon tes zonis sismichis al è une vore impuartant sigurâ une rispueste scatolâr globâl di chescj e duncje i solârs a àn di garantî un compuartament a diaframe rigjit tal plan (Tomaževicˇ 1999). Une tecniche di intervent che e funzione ben e che e je une vore doprade in Italie e je fondade su la realizazion di une sezion misturade len-beton, fate cui trâfs di len e une cape di beton di 4-5 cm di spessôr midiant conetôrs metalics di tipologjiis diferentis (Turrini, Piazza 1983; Giurani 2004; Gutkowski et al. 2008). La sezion misturade di len-beton e sigure une plui fuarte rigjiditât e tal stes timp la cape di beton, se conetude in maniere juste cui mûrs perimetrâi, e rive a creâ un diaframe di plan e miorâ la resistence globâl dai edificis in modon cuintri des azions sismichis. Il beton al permet ancje di ridistribuî i carics, al da un bon isolament acustic e protezion cuintri dal fûc. Dut câs ancje une solete pôc gruesse e aumente i carics permanents, lis azions su lis fondis e la entitât de azion sismiche. La sensibilitât simpri plui sintude pal restaur dai edificis e à puartât intai ultins agns a cirî soluzions tecnichis che a podedin garantî la autenticitât e la integritât dal manufat, la conservazion dai materiâi dal intervent, la sô compatibilitât cun ce che al è za, su la fonde dai principis des Cjartis dal Restaur (Venice Charter 1964; Krakow Charter 2000; ISCARSAH-ICOMOS 2003; UNI 2004)). Ideis diferentis a son stadis studiadis di pôc par disvilupâ soluzions reversibilis e mancul invasivis, doprant par esempli profîi di açâr o soletis di malte pôc gruessis. Plui di resint a son stadis proponudis soluzions inovativis fondadis su elements di len.