Neurolinguistiche e cognitivisim animâl

Ristret

L’om cu la evoluzion al à svilupât il lengaç, une des sôs risorsis plui preziosis; in graciis di chel, la riproduzion e je deventade plui ordenade e continuative, e chest al è provât dal fat che la specie umane e domine il planet. Cheste evoluzion nus à diferenziâts in maniere particolâr di chês altris speciis; il lengaç al è il quid che nus met intune posizion divierse rispiet a chei altris animâi. Lis speciis animâls, di conseguence, a àn une maniere di comunicâ diferente, che l’om al fâs fature a capî e spes ancje a ricognossi. La evoluzion, no vint agjît sul lengaç dai animâi, e podarès vê svilupât in lôr dai sens diviers e une sensibilitât particolâr che tal om a son stâts cidinâts de espansion dal neocerviel.
L’animâl di fat, vint un cerviel retilian, vâl a dî vuidât dal istint e di derivazion plui antighe dal neocerviel uman, al à carateristichis intuitivis diviersis di chês umanis, e chest al spieghe abilitâts come chês dai cjans che a sintin fenomens naturâi come i taramots prin che a sucedin.
La neurolinguistiche, traviers di câs particolârs presints te nestre analisi, e tente di indagâ chest lengaç, par capî i siei mecanisims e tornâ, forsit, in relazion cun chel che, par cause de evoluzion, o vin pierdût.