Provis dinamichis e lôr aplicazions inte Inzegnerie Civîl

Ristret

Tes ultimis desenis di agns si è assistût a un interès simpri plui fuart viers il disvilup e la aplicazion di provis dinamichis inte Inzegnerie Civîl. Lis finalitâts di chestis tecnichis a son tantis. Dopradis intal colaut di oparis, par esempli, a puedin dâ indicazions su la esatece dai modei struturâi o su la realizazion corete dal progjet. Provis dinamichis ripetudis a distance di timp a puedin judâ a cjatâ dams capitâts intal cors de vite di une opare e previodi i lôr efiets. In chest setôr di ricercje, il disvilup tecnologjic resint al à metût a disposizion metodologjiis precisis e siguris. Ma, intant che lis tecnichis sperimentâls a levin man a man perfezionantsi, la interpretazion des misuris e je restade un pas indaûr. Il motîf principâl di chestis dificoltâts al è di cirî inte nature invierse dai problemis di identificazion struturâl e inte mancjance di un cuadri teoric complet. Cun di plui, tal studi di struturis in scjale reâl si scuintrisi cun dute une serie di pidiments dovûts a la complicazion dai sistemis studiâts, a la imprecision dai modei numerics che si doprin par interpretâ lis misuris e a la scjarsetât dai dâts sperimentâi. In cheste rassegne si presente e si discut cualchidun di chescj ponts cun riferiment a esperiencis disvilupadis dal grup di ricercje coordenât dal autôr intai ultins agns. In particolâr, si discutin aplicazions des provis dinamichis pal colaut di puints e grancj edificis, pe diagnostiche struturâl e come supuart pe verifiche sismiche di costruzions strategjichis.