La imigrazion percepide. Il câs di studi dal Comun di Puçui

Ristret

Chest studi al esplore la percezion dai residents dal comun furlan di Puçui tai confronts dal fenomen imigratori dai forescj. Pe sô realizazion e je stade condusude une indagjin demoscopiche formulade traviers di un cuestionari di sessante domandis dividudis in trê sezions tematichis; il cuestionari al è stât inviât par pueste a un campion de popolazion sielzût in modalitât random e stimât al dîs par cent dai residents, mantignint inalterade cheste cuote par ognidune des frazions dal teritori comunâl. Lis rispuestis al cuestionari autosoministrât a son stadis analizadis traviers dal software di statistiche “Statistical Package for Social Science”. I risultâts ripuartâts in chest articul a rapresentin une part de totalitât des rispuestis che, tai câs di interès, a son stadis incrosadis fra di lôr di mût di furnî une imagjin complete ancje tal detai par chel che al rivuarde la percezion di chest fenomen. In chest studi al ven a flôr un interès pes cuistions relativis al procès de imigrazion che, in gjenerâl, si dimostre plui sostignût pai rispuindints des fassis di etât plui zovinis e pai contescj gjeografics plui dongje, e par cuintri mancul significatîf pes fassis di etât plui anzianis e pai contescj spaziâi plui lontans. Sedi ae solidarietât che al bon acet e ven ricognossude une impuartance significative, cuntune propension pe solidarietât; tes rispuestis si cjate ad ogni mût une variazion par chel che al rivuarde la preference dai destinataris dai doi sintiments, dulà che la solidarietât e ven indreçade a “cualsisei”, e invezit l’acet si lu rivolç soredut a lis personis plui dongje dal contest di vite di cui che al rispuint. In chest lavôr si à ponude atenzion ancje ae analisi des carateristichis dai imigrâts dal forest, relativementri al paîs di divignince dal imigrât, ae sô religjon, titul di studi e motîf di rivade; cheste ultime e je considerade la variabile che e ven plui tignude in considerazion dal autocton. Dal studi al ven fûr che il paîs di divignince dal forest, ancje se nol è considerât une variabile influente par determinâ l’acet di une persone straniere, al ven ad ogni mût tignût in considerazion. In cont di chest, lis rispuestis a mostrin che la preference acordade a provignincis tant che Europe Ocidentâl e Nord Americhe si compagne cuntune plui alte tindince a refudâ cui che al rive di un paîs arap; l’ordin des preferencis pes areis gjeografichis al ven mantignût par dutis lis diviersis categoriis di relazion sociâl proponudis te indagjin. In chest studi, se e risulte une preference pes realtâts plui dongje di chês dal autocton, e emerç in ogni câs une sô sostanziâl viertidure aes componentis forestis, che lu puartin a jentrâ in contat cui imigrâts cence però pierdi il control de sô realtât e dal so spazi di vite.