I Payments for Ecosystem Services a pro dal paisaç e dal ambient

Ristret

La protezion dal paisaç e je stade gjestide a lunc de Aministrazion Publiche, che par davuelzi chest compit e à doprât struments vincolistics. Chescj no àn rivât a fâ cuintri aes conseguencis negativis che a derivin dal abandon dai terens agricui; in plui al è di un pôc che a son caladis lis risorsis finanziariis a pro de protezion dal paisaç e dal ambient. Chestis dôs cundizions a àn favorît altris struments, come i struments economics a pro de conservazion dal paisaç e dal ambient, che a previodin une partecipazion impuartante dai atôrs privâts. In chest lavôr, su la fonde dai studis su la valutazion monetarie e no monetarie dal paisaç e dal ambient che a son stâts svilupâts tai ultins agns e che nus àn judâts di une bande a individuâ chei caratars che a rindin biel il paisaç e di chê altre a identificâ trop che un al varès voie di paiâ par doprâ un servizi che al ven dal paisaç e dal ambient, o procurìn di capî se al è pussibil meti adun un marcjât pai servizis prodots tignint di cont il paisaç e l’ambient. Par stabilî se e je vere che doprant il marcjât e i struments economics si pues fâ cressi il benstâ de societât, o vin sielzût il câs dai Payments for Ecosystem Services (PES). I PES a son struments economics che a vegnin doprâts a pro de conservazion e valorizazion dai servizis ecosistemics che il paisaç e l’ambient a son bogns di produsi. Dopo di une sclagne descrizion di chest strument, il lavôr si ferme sore la pussibilitât di doprâ chest strument a pro dai servizis dal paisaç e dal ambient in Italie e soredut in Friûl Vignesie Julie.