Mecanisims gnervôs che a controlin la sielte des lenghis

Ristret

Lesions intal çurviel a puedin puartâ lis personis bilengâls a no rivâ a tignî plui disseparadis lis dôs lenghis o pûr a no rivâ plui a doprâlis intal just contest. Malâts che a presentin un miscliçament patologjic des lenghis a fasin une misture di peraulis des dôs lenghis intune stesse frase. I malâts che invezit a presentin un gambiament patologjic des lenghis a passin di une a chê altre intal rispiet dai confins dai enunciâts (par enunciât si intint un segment di produzion verbâl che e puarte un significât indipendent). Fin in dì di vuê al è stât studiât un bon numar di malâts che daspò une lesion intal lobi temporo-parietâl di çampe a presentavin un miscliçament patologjic des lenghis. Par cuintri pocjis publicazions si riferissin al gambiament patologjic des lenghis. In cheste publicazion nô o vin studiât un individui bilengâl che daspò un tumôr intal lobi frontâl di çampe e in parts dai zîrs cingulâts anteriôrs, al presentave un gambiament patologjic des lenghis cence nissun disturp dal lengaç. Chest al vûl dî che i mecanisims che a controlin il gambiament des lenghis a son indipendents dal lengaç e a fasin part dai mecanisims plui gjenerâi di sielte dai compuartaments.