La societât de informazion: cirint lis origjins

Ristret

Chest lavôr si propon di presentâ intune forme acessibile ancje ai no specialiscj i fondaments teorics de teorie de informazion che e je ae base des rêts di telecomunicazion. Si fâs riferiment in particolâr ae complessitât des rêts che ogni dì ancje nô si coleghìn cuant che cul nestri computer o cun altris imprescj (iPod, iPad) si tachìn al Web, la tele di ragn che aromai e involuce la tiere e nus permet di comunicâ a nivel planetari. A vegnin individuadis lis tapis origjinâls di chest senari: la formulazion de teorie matematiche de informazion di bande di Shannon e la scuvierte dal transistor fate di Bardeen, Brattain e Shockley. Al ven presentât in curt il contignût essenziâl de teorie di Shannon: la intuizion fondamentâl de nature discrete de informazion, la sô misure, la nature dai canâi di trasmission e des tecnichis di protezion de informazion trasmetude. Infin, al ven presentât e discutût il risultât plui impuartant de teorie, il teoreme de codificazion dal canâl. Chest teoreme, dongje des risorsis za cognossudis dai inzegnîrs che si ocupavin di trasmeti la informazion – vâl a dî la potence dal trasmetidôr e la bande di frecuence dal canâl trasmissîf – al individue te complessitât de elaborazion dal segnâl une gnove risorse che e pues garantî la afidabillitât dal procès. Elaborazions simpri plui complessis dal segnâl di trasmeti a son deventadis pussibilis cui svilups de microeletroniche. Chescj svilups a àn permetût di doprâ te maniere miôr lis prospetivis viertis de teorie. E nas cussì la ete de societât de informazion e di cheste a son descritis in struc lis principâls tindincis tecnologjichis. Il lavôr al è sierât di une serie di considerazions critichis su la distinzion jenfri informazion e cognossince e su la necessitât strategjiche di formâ te maniere plui juste lis gnovis gjenerazions.