I Progjets SUPERCOMET a Udin

Ristret

SUPERCOMET 2 (SUPERCOnductivity Multimedia Educational Tool phase 2) al è un progjet dentri dal Program “Leonardo da Vinci II – timp” de Union Europeane che al cjape dentri Universitâts e Scuelis Secondariis di 15 paîs europeans. Chest progjet si propon di produsi un strument multimediâl pal studi de supercondutivitât e di creâ une comunitât a nivel european, motivade a dâ vivôr al insegnament de Fisiche intune suaze di viertidure aes colaborazions internazionâls. A son stâts disvilupâts diviers materiâi: animazions interativis, tescj, videos, materiâi hands on cun chê di fâ misuris e dimostrazions sul fenomen de supercondutivitât. Cul compagnament di une guide par l’insegnant chescj materiâi a son stâts doprâts sei intai seminaris che inte sperimentazion in classe intes scuelis che a àn aderît al progjet. In Italie a cjâf dal progjet1 e je la Universitât di Udin, cun compits di coordinament de sperimentazion che e cjape dentri students di scuelis difarentis di plui regjons talianis. La planificazion dai percors e met in schirie diviersis propuestis di curriculum che a considerin strategjiis di logament, metodis e contignûts. Scuelis e insegnants di Udin a son stâts metûts dentri ativementri tal progjet: tal articul a vegnin presentâts e analizâts i percors de sperimentazion che i insegnants a àn metût adun.