Lis Termis Romanis e la Basiliche Patriarcjâl di Aquilee studiadis midiant lis modernis tecnichis di rilevament e di rapresentazion

Ristret

L’articul al trate dal studi des Termis Romanis e de Basiliche Patriarcjâl di Aquilee midiant lis modernis tecnichis di rilevament integrât laser scanning/fotogrametric e di rapresentazion. Come Introduzion preliminâr, e ven juste ricuardade in struc la grandiose storie di Aquilee, cussì come chê des Grandis Termis Romanis, che in dì di vuê a son une largje aree di sgjâfs archeologjics, e de Basiliche Patriarcjâl, un dai plui impuartants monuments de architeture romaniche italiane. Intal cjapitul daûr Materiâi e metodis si conte, dopo vê spiegât il funzionament dal laser scanning, des difarentis fasis operativis che a permetin di acuisî automatichementri nûi indipendents di milions di ponts 3D, di trasformâ chescj intune sole superficie 3D vistude a colôrs e gjeo-referenziade, e di rapresentâle in maniere formidabile in tancj difarents vistîts digjitâls. Intal cjapitul Risultâts, e ven mostrade la aplicazion pratiche di rilevament e di rapresentazion ai doi lûcs aquileiês, rimarcant la complete automazion de acuisizion dai dâts in cjamp e la impressionalitât des elaborazions dai dâts e des rapresentazions digjitâls fatis traviers software dedicâts. Come Discussion finâl, e ven comentade e proietade la esperience provade pai câs di Aquilee, concentrant plui di dut la atenzion sul pont-clâf dal livel di automazion puartât fûr intes elaborazions dai dâts, cence dismenteâsi che al è complet chel de acuisizion dai dâts stes.